Acts 5

Ananaiyasi'e Sapaila'efe'mo anava gemo hu'niya gemae

1Ani kava'mo hu'niya'monanafa mago vekamo agi'amo Ananaiyasi'e a'amo agi'amo Sapaila'e'mo anakae mopamo maketi hu male'na'ageno mago vekamo'a miya fai'niya monimo alino fako huno mago moni'amo alino fala ki maleteno mago moni'amo alininuno apa vaya'mo apami'niye. Male'niya monimo a'amo'mo age'niye. 3Pita'a, Ananaiyasiyo, huno, Na kava higeka Satani'mo ate'nanageno kaipafi'mo faleno hai'nigeka mago vekamo'a mago mopamo miya fai'niya monimo alika fako huka maleteka eka Goti Auneme'ae'mo aigofe gemo hu'nane. 4Hogoteka maketi osu'nana afina'mo kagaika mopamo hane'niye. Maketi hu male'nanageno miya fai'niya monimo kagaika ya'mo hane'niya'monanafa na kava higeka ani agufa hosu kaipa kagesa afi'nane. Kagaemo vaya'aife'mo aigofe gemo osu'nana'monanafa Gotife'mo aigofe gemo hu'nane, huno ha pai'niye. 5Ananaiyasi'a ani gemo afiteno'ae'mo mopafi'mo asagauno aiteno fali'niye. Ani kavafe'mo ava gemo afi'naya vaya'mogimo lusi kava hu'a koli hu'nae. 6Fali'nige'apae'mo mago neya vemogi e'a ali'a hayaete'a hi'yopa male'a alini u'a ki'a ate'nae. 7Aise afina'mo lole'e mago'e aovamo utegeno a'amo'mo ani afole ai'niya kavafe'mo ava gemo o'afino afa'a e'niye. 8Pita'a, Naha paiyo, huno, Lanakae mopamo maketi hu male'na'ageno miya fai'nigetana ali'na'a monimo alagipi mago'e hane'negaiye, huno afi ge'nigeno'ae'mo, ha'ao, huno, mago'e monimo o'ali'no'ae, huno ha pai'niye. 9Pita'a, Na kava higetana aigofe gemo hugu'ae, hutana hu male'netana Goti Auneme'ae'mo amalageka hutana ne'ata'ae. Anaukamo'mo fali'nige'a alini u'a ki'a ate'naya vaya'mo kipate ne'ayanage'a hi'yopa alini u'a ki'a kategae, huno ha nepaigeno'ae'mo 10malage huno mopafi'mo asagauno aiteno fali'niye. Neya vemogimo e'a agayana ago fali'nige'a hi'yopa alini u'a anau'amo'e'mo lokae'a ki'a anate'nae. 11Muki siosi vaya'mogi'e ani kavafe'mo ava gemo afi'naya vaya'mogi'e'mo lusi kava hu'a koli hu'nae.

Apa vaya'mogimo no'agaya agufa lokiya aune kava'mo hu'naya gemae

12Ani afina'mo apa vaya'mogimo muki no'agaya agufa lokiya aune kava'mo hu'nae. Muki siosi vaya'mogi magoke agufa apaipa apakesa ali'ne'a Salomoni hiyato nopi'mo u'a ali'a anupa hu'a mai'nae. 13Muki malaga vaya'mogimo Goti mafa'nemogi apaki'apile'mo ali'a asaga hu'a apate'naya'monanafa e'a magokepi ali'a anupa hu'a maisayafeke'mo koli hu'nae. 14Mago'e mago'e hu'a lusi ve a'nemogimo Ala kava nefe'mo apakesa afi'a fatago hu'nageno Goti'a magokepi alino anupa huno apate'nige'apae'mo ali'a anupa hu'a mai'nae. 15Mai'naya'mofe'mo kaita hapau'niya vaya'mo apavaleli'u'a kate'mo apate'ne'a hipale'mo havae'a apatege yakaikonamo aite'a havae'a apatege hu'ne'apae'mo, Pita'a uneno nehisigeno'ae'mo yege aune'amo'mo apakufale'mo aino halesigeno kaita'apimo alino hapageno apategaiye, hu'a apakesa afi'nae. 16Asole vaya'mo Yulusalemu haopalega muki taoni'afati'mo kaita hapau'niya vaya'e hosu apaune vaya'mo apaipafi'mo mai'niya vaya'e'mo apavaleli ete ete hu'a apate'nageno muki alu kaita alu kaita'apimo hano hu'nige'a he ti'nae.

Apa vaya'mogimo kanamo ali'naya gemae

17Ani kava'mo nehage'apae'mo hogote vekamo mono hu'a ne'apataya vaya'aite'mo yagaino ne'apateya veka'e Satiyusi mono vayapati vaya'mogi'e'mo apa vaya'aife'mo apaipa kafamo hapae'nae. 18He ti'a apa vaya'mo apavaleli u'a gamani vaya'ai kalavusifi'mo hu'a apate'nae. 19Apate'naya'monanafa mago Ala kava ne'mo enisole vekamo'a hani'ilagamo emineno kalavusi nopi kitamo yakino apavalelino lamino kumate'mo apate'neno'ae'mo, 20Utapa alopa mono nopi'mo haitapa he titapa mai'netapa ani saufa kavafe'mo ava gemo aetapa hakalo hutapa hapa paiyo, huno hapa pai'niye. 21Apa vaya'mogimo ge'amo afite'a akame hu'a kotilamiyapi'mo u'a alopa mono nopi'mo fale'a hai'a aepa fai'a ali'a apaya male'nae. Mono hu'a ne'apataya vaya'aite'mo yagaino ne'apateya veka'e vaya'amogi'e'mo muki Yu vaya'aite'mo yagai'a ne'apataya vayatama vaya'aife'mo ge hu'nage'a e'a kanisole vaya'e'mo ali'a anupa hu'a mai'nae. Mai'ne'apae'mo ati vaya'aife'mo, uta kalavusi nopati'mo apavalelitapa eyo, hu'a ali'a apate'nage'a u'nae. 22U'a kalavusi note'mo ava'yi hute'a apakayana apa vaya'mo o'mai'nage'a atale'a ai'a atagi ne'a e'apae'mo, 23ago uta ava'yi huteta agonana kalavusi nopi'mo o'mai'nage'a yagai'a ne'apataya vayake'mo yagai'a mai'nae. Kitamo yakituta haita agonana afa'a hane'nigeta age'none, hu'a hapa pai'nae. 24Hogote vekamo mono hu'a ne'apataya vaya'aite'mo yagaino ne'apateya vekagi alopa mono note'mo ne'yagaiya ati vaya'aite'mo yagai'a ne'apataya vayanagi mono hu'a ne'apataya vaya'aite'mo yagai'a ne'apataya vayanagi hu'a ani gemo afite'apae'mo, Haiya agufa kava hute'a haiya kateti'mo u'a mai'nae, hu'a hu'nae. 25Mago vekamo eno'ae'mo, Afiyo, huno, Lapakaemo kalavusi hutapa apate'naya vaya'mo u'a alopa mono nopi'mo hai'a mai'ne'apae'mo ali'a apaya ne'malae, huno hapa pai'niye. 26Ati vaya'aite'mo yagaino ne'apateya veka'e ati vaya'a'e'mo u'a apa vaya'mo apavaleli'a e'nae. Apakaemo, fiku yanage'a vaya'mogimo yafa kayoteti'mo lamagigae, hu'a apakesa afite'a o'apamagi'a afa'a vase hu'a apavaleli'a e'nae. 27Apakaemo apavaleli'e'a kanisole vaya'ai apaulagale'mo ali'a he ti'a apate'nageno mono hu'a ne'apataya vaya'aite'mo yagaino ne'apateya vekamo'a loka huno apafi ge'niye, 28Ani vekamo agi'alefe'mo alitapa apaya o'maleyo, huta lokiya gemo huta lapa opai'nopiye. Ago lapa pai'nona'monanafa ani getapimo'mo aino atagu faeno uneno huno Yulusalemu taonifi'mo havai te'niye. Lapakaemo aigofe gemo hutapae'mo, apakaemo ani vekamo amagi'nae, hutapa lagaepike'mo alitapa fai nelatae, huno hapa pai'niye.

29Pita'e mago apa vaya'mogi'e'mo ge'ale'mo ae'a atagaina hu'a hapa pai'apae'mo, Goti ge'amo akame hutetae'mo vaya'ai ge'apimo afa'a akame osisuna kava'mo hane'niye. 30Lapakaemo, malipu yosale'mo nili aitetapa alita he titapa ateyo, hutapa hu'nageno'ae'mo laginago vaya'mogi Goti'apimo'mo Yesu'a fali'niyateti'mo ago alino he tino ate'niye. 31Goti'a ala agi'amo amiteno avalelino haino lamaga haopale'mo ate'neno'ae'mo, hogote vekamo yagaino apatesiya vekamo mai'neno apakufamo alino katino ne'apateya vekae, huno lekana paino ate'niye. Isaleli vaya'mogita laipamo alita afe lesuna kava'mo alino lamige hosu kavatimo alino atalege huno maisiyafe'mae, hu'a hapa paite'a, 32Lagaemo ani kavafe'mo ava gemo huta aeta hakalo huta hapa nepauna vaya'mo mai'none. Lagae'e Goti Auneme'amo'mo Goti ge'amo akame nehaya vaya'mo fiku hapa maeno ne'apamiya Auneme'amo'e'mo ava gemo nehune, hu'a hapa pai'nae.

33Kanisole vaya'mogimo ani gemo afi'nageno'ae'mo ani gemo'a apaipafi'mo fai'nigeno'ae'mo apaipamo lusi kava huno le'nige'apae'mo, ani vaya'mo hapaegaune, hu'a hute'a ge huge afige hu'a mai'nae. 34Apakaepati'mo mago vekamo Falasi vayapati vekamo agi'amo Gameli'eli'a ke'aepa gemo alino apaya ne'maleya vekamo mai'niye. Muki vaya'mogi agi'ale'mo ali'a ne'asagaya vekamo'a he tino kanisole vaya'aife'mo, Ani vaya'mo kumatega apavalelitapa lamiyo, huno hapa paiteno 35kanisole vaya'aife'mo, Isaleli vaya'mogitapae, huno, Ani vaya'aitegamo na kava hugune, hutapa osu'netapa hogotetapa alagepa hutapa lapakesa afiyo. 36Akeya'vilaga mago vekamo agi'amo Tiyunasi'a afole aiteno'ae'mo, ala vekamo mai'nove, huno hapa pai'nige'a fo hataleti'a agufa vemogi akame hu'nae. Mago vaya'mogi e'a amagi'nageno fali'nige'apae'mo akame hu'naya vaya'mo atale'a atagu fae'u'e'a hu'a mai'nageno ali'ya'amo ago hano hu'niye. 37Henaga'amo mago Galeliya kotega vekamo agi'amo Yutasi'a apaki ali'naya afina'mo afole ai'nigeno'ae'mo asole vaya'mogi e'a akame hisayafe'mo apayate'mo ali'niye. Ani kava'mo hu'a amagi'nageno fali'nige'a ali'a hapa faitalage'a atale'u'e'a hu'a afa'a mai'nae. 38Hu'naya'mofe'mo nagaemo hu'nae'mo, ma mopafi vaya'mogi ali'a aepa fai'nisaya'mo'mo afa'a hano hugiye. 39Inagi Goti'a alino aepa fai'nisiya'mo'mo lapakaemo alitapa hano hutapa o'atalegae. Fiku yanagetapa lapakaemo Goti kame'amo maigae. Mago kava'mo apakaetegamo osutapa afa'a apataleyo, hu'na lapa nepauve, huno hapa pai'niye. 40Kanisole vaya'mogimo ani gemo afite'apae'mo akame hu'a apa vaya'aife'mo gemo hu'nage'a e'nage'apae'mo nofi kayoteti'mo apamagite'apae'mo, Yesu agi'amo aetetapae'mo mago'e gemo osutapa afa'a maiyo, hu'a hapa paite'a ali'a apate'nage'a u'nae. 41Apa vaya'mo kanisole vaya'ai nopati'mo atale'a kumatega nelami'apae'mo, Vae, hu'a, Goti'a lagaefe'mo, Yesu agi'alefe'mo apakafu kisiya ya'mo afa'a alisaya vaya'mo mai'nae, huno agesa afi'niye. Lagitile'mo ali'a afepi latete'a lavagage hisiya ya'mo ali'a lamigefe hu'nae, hu'a apakesa afite'a lusi kava hu'a apamogaga ai'nae. 42Apa vaya'mogimo muki afina'ae afina'ae'mo alopa mono nopi'e no'apifi'e'mo Yesu'a Kalaisi ne'mo mai'niye, hu'a ali'a apaya malege ae'a hakalo hu'a hapa paige hu'a mai'nae.